📕 ريفيو رواية: نبضات الظلام
✍️الكاتبة: منار السيد
🖋️ قراءة: ماريو سعد
•التقييم الكلي: 8/10 ⭐⭐⭐⭐⭐⭐⭐⭐
أولاً: نقاط القوة (التقييم الفني)
1️⃣ الفكرة – 7/10
فكرة الجماعة السرية اللي بتعمل تجارب على البشر ممكن تكون اتعملت قبل كده شوية، لكن الرواية قدرت تقدّمها بطريقة ممتعة ومفيهاش ملل خالص. طريقة تنفيذ الفكرة وحبكتها كانت جذابة جدًا وخليتني مشدود طول الوقت.
2️⃣ أسلوب الكتابة – 8/10
أسلوب الكاتبة ممتاز جدًا، خصوصًا في بساطة النص، ومن غير مبالغة في التعبيرات أو استخدام مصطلحات صعبة عشان تبين موهبتها. النظام اللي ابتكرته في سرد الفصول كان حلو جدًا؛ بتدي مقدمة صغيرة لكل فصل قبل ما الأحداث تحصل، ومع كده القارئ بيتفاجئ من الأحداث من غير ما يكون حصل له أي spoil.
كمان عجبني جدًا إدراج C.V مصغر لكل شخصية ومكان في آخر الرواية، حاجة مبتكرة وجديدة وأضافت تجربة حلوة للقارئ.
3️⃣ تطور الشخصيات – 8/10
الشخصيات متطورة بشكل واضح، ودوافعهم منطقية، وده خلى الشخصيات واقعية وسهل على القارئ يتعاطف معاها.
4️⃣ الحبكة – 8/10
الأحداث مترابطة كويس، وفيها تصاعد درامي مناسب يخلي القارئ متحمس يعرف إيه اللي هيحصل بعد كده.
5️⃣ إيقاع الرواية – 9/10
الإيقاع متوازن جدًا، مفيش حشو أو مطّ للأحداث، وده خلى القراءة سلسة وممتعة.
⭐ التقييم العام – 8/10
"رواية نبضات الظلام تجربة قوية وممتعة، أسلوبها مبتكر وبعض التفاصيل الصغيرة ضافت لمسة مميزة. الكاتبة منار السيد واعدة، ومن الرائع نشوف أفكار وأساليب جديدة زي دي..
خلاص فرحنا واتبسطنا بإيجابيات الرواية، ندخل بقى على السلبيات اللى كانت هتجيبلى جلطه
1- الرواية بتتكلم عن التجارب السرية بس الكاتبة قررت متقولناش ايه هى التجارب دى (تقريبا علشان سرية ههههه إفيه وحش
2- في مشاهد لملفات بتدين وتبرأ الحاج ابو ديالا بس بردو معرفناش ايه اللى جوه الملفات دى، هو يدين يعنى يدين ويبرأ يعنى يبرأ انت هتعرف اكتر من الكاتبة ؟
3- ذكرت ان في احداث شغلت المدينة لسنين بس نسيت تقولنا إيه هى الأحداث دى ف كده انا اللى انشغلت مش المدينة
4- نركز بقى في النقطة دى علشان كنت هتشل فيها
ديالا وصلت المكان السرى اللى هو فين بقى ؟ تحت المستشفى
وليد بقى فرد الأمن بينزل عادى القبو ده وقال إن ممنوع النزول هنا و إن ده (مكان سرى)
المستشفى فيها ناس تبع المنظمة السرية
المكان ده كانت المنظمة نفسها بتستخدمه ومن بعدهم والد ديالا
بعد كل ده والمنظمة مفكرتش حتى ولا جه على بالها تدور في المكان ده؟
5- إزاى و ليه غرفة فريد اللى اتحرقت فضلت محروقة متجددتش شهووور كتير ولما جت ديالا تدخلها لقيت عم وليد بتاع الامن بيقولها انه جايب صنايعية يعملوها
6- إزاى الحارس عارف كل خطوة بتعملها ديالا ومعرفش انها راحت للبوليس ؟
7- إزاى لقيوا الخريطة في وشهم كده في المبنى المهجور يعني مش مستخبية؟
طيب بعد كل ده انا ليه اديت الرواية 8 من 10 ؟ لأن حل كل دول هو جزء تانى للرواية تحكيلنا فيه مين المنظمة دى وازاى بدأت وايه نوع التجارب ونجحوا في ايه وفشلوا في ايه وايه اللى حصل للمدينة … إلخ
كمان برغم كل ده الا ان الرواية جميلة
ولكن فعلآ الجزء الثانى هيخليها أقوى
والسلام عليكم ورحمة الله وبركاته
شاركنا رأيك في التعليقات بعد القراءة: هل تعتقد أن الجزء الثاني سيفك شفرات المنظمة السرية؟ 👇
#نبضات_الظلام #منار_السيد #روايات_غموض #تشويق #مراجعة_رواية #أدب_الجريمة #إثارة #قراءة #روايات_مصرية