الصحفية/ رِهام الباز
-ممكن تعرف نفسك؟
فاطمة عيد
-ممكن تقولنا بدأت في مجال الكتابة أمتى؟
من خمس سنين لكن بدأت أظهر أعمالي من اربع سنين
-مين أكتر الشخصيات اللي قابلتك في مجال الكتابة وأثر فيك؟
انا عارفه إنها حاجه غريبة لكن أنا متخذتش قدوة ف مجال الكتابة انا عايزة أكون بس فاطمة عيد ب أخطأها ف الماضي ف المجال ده و تطورها الملحوظ دلوقتي و ف المستقبل ،أكيد انا من أشد المعجبين لناس كتير ف المجال لكن عايزة اوصل لنقطة تكون بتاعتي
-هل واجتهك صعوبات؟
وازاي تخطيتها واتعاملت معاها؟
بصراحة أنا صعوباتي كانت خفية يعني مواجهتش نقض كتير لكن بعد كل عمل كنت بمر على أخطائه و أتفاداها ف اللي بعده و ده سبب تشتت ليا ف بعض الأحيان لكن اكتشفت إن لازم ك كاتبة أكون مُطلعه أكتر و أطلع على أفكار غيري بما إني بفضل اللون الاجتماعي و أتقبل فكره ده ،من ضمن الصعوبات إني كنت بختصر جدا ف السرد زمان خوف من إن القارئ يمل أو استخدم مصطلح مش شائع ف ميفهمهوش و فكرت وقتها إن ده ممكن يميز أعمالي وقتها وهو كان عاجب القارئ العادي فعلا لكن مكنتش راضيه عنه ك كاتبة و القارئ المثقف فعلا وارد يتقبله لكن مش إلى حد الرضا التام لكن قدرت أعالج المشكله دي ف آخر روايتين ليا و عملت اللي يرضيني ك كاتبة و يرضي الجانب الفني الخاص بالعمل
-بنسبالك الكتابة هواية أو موهبة ولا ممكن إي شخص يكتب عادي؟
الفكر اللي بيقود الشخص للكتابه هو هبة لو كان في منه مغزى ،انا بشوف إن أي كاتب بيكون هاوي الكتابة و مكتسب مهارة و عنده موهبة الفكر اللي ذكرتها وارد ده كله ميتوفرش ف كاتب مُبتدأ لانه بيجي بالتدريج لكن الاشياء دي بتتنمى و تُكتسب مع الوقت من خلال المواظبة على الكتابة
_ إيه نوع من أنواع الكتابة المفضلة ليك؟
أخدت فترة كنت بفضل كتب علم النفس حتى لو مش بشكل مباشر ،و أكيد الأعمال الروائية خصوصًا اللي بتتميز بالجانب الاجتماعي
-من رايك أهم الصفات في الكاتب هي إيه؟
الإصرار .. أعتقد إن أوقات كتير بكون هتراجع عن إني اكمل ف طريق الكتابة بلاقي بعدها في مقاومة و إصرار اني مستسلمش للقرار ده خصوصًا بعد الدعم و رفض اللي حوليا انسحابي بلاقي تفكيري موجهني ل نفس الحته ،من الصفات التانيه إن الكاتب لازم يكون داعم و واسع الاُفق مينفعش أبدًا يشوف الحاجه من وجهة نظره هو بس
-مين مثلك الأعلي؟
ف الغالب انا عمري ما إقتضيت بحد ف مش عارفه أجاوب
-مين وقف جمبك وشجعك في أول خطوة ليك؟
اول حد اكتشف اني بكتب كانت صديقه ليا هي ندى ابو الحسن ،و اللي كملت الطريق معايا ك أول خطوة حقيقية و كل الخطوات الجاية بإذن الله هي نعمة الله زكريا و انا حقيقي مُمتنه لوجودها معايا لأنها مش بس داعمتي اد ما أوقات كتير بتكون مُلهمتي و سر إني أكمل ف كل حاجه مش الكتابة بس و هي هيفضل ليها فضل كبير بعد ربنا إني لسه بخير و مكملة
-كلمنا عن انجازاتك؟
عملت خمس روايات الكترونيه "الضيف الخفي ،تناثُر العشق ،ظلام الرعد ،لحن الهوى لم يشدو"
اشتركت في كتاب مجمع سنة ٢٠٢١ وهو "عزيزتي إيزيس "
أطلقت سلسلة خواطر أحبار عابثة على حسابي الشخصي و انتهت بحمد الله ،ده غير باقي الخواطر الجديدة الموجوده على حسابي الشخصي برضو
-كلمنا عن خططك المستقبلية؟
هعتبر نفسي ف بريك من الظهور في سنة 2023 لاني بخطط لعمل لو في توفيق هيكون ف معرض 2024 اتمنى يكمل على خير لاني متحمساله و هو مختلف عن كل اللي قدمته من أعمال قبل كده ،في خطط تانيه غير مؤكدة ف مش هفصح عنها دلوقتي
-هل عندك مواهب تانية؟
الفترة دي لا مُتفرغة للكتابة و القراءة فقط و الكتابة أكتر الحقيقة
-وجه كلمه للجريدة؟
بشكر الجريدة على الحوار اللطيف ده بشكل عام و بشكرك انتِ شخصيًا و مبسوطة بالحوار معاكي حقيقي
-كلمة أخيرة نختم بيها الحوار الصحفي؟
هتكون لـ قارئي ،بشكر الداعمين ليا أولًا ثانيًا انا مش مثالية مُعترفة بـ إن عندي أعمال مش مثالية و أعمال فعلا ظاهر فيها مدى جهدي و تفكيري فـ أتمنى محدش يحكم على عملي من عمل واحد خصوصًا لو كان من أعمالي القديمة ،انا مش عايزه احذف الأعمال دي لانها سبب بدايتي و هي أول سلمة وصلتني ل هنا و بسببها في ناس كتير حابينها لحد دلوقتي بس مينفعش أبدًا تقارن عمل بقاله سنين ب كفائتي و خبرتي الحالية لاني بسعى للتطور يمكن بلا مبالغة بشكل يومي و بشكركم كلكم مرة تانية.
سعدت جدًا بالحوار مع حضرتك شكرًا جزيلًا.
رئيس التحرير: عبدالله إبراهيم
نائب رئيس التحرير: مريم عبدالهادي كامل
الوسوم:
عدد اليوم