كتبت: رِهام الباز
- حكايتك بدأت مع موهبة الكتابة أمتي؟
= من عشر سنين كنت لسه ف ثانوي عام
- مين أكتر الشخصيات المؤثرة اللي قابلتك في مجال الكتابة؟
= أنا بكتب شعر عامي فبالتالي بميل جدا للشعر العامي ومن أهمهم بالنسبالي هو ”عمرو حسن" و"نبيل عبد الحميد" و"مصطفى ابراهيم" وبلاقي كل واحد فيهم مختلف عن التاني، كل واحد ليه لون خاص بيه ومدرسة الكل يتعلم منها ويتأثر بيها.
- هل واجهتك صعوبات؟
وازاي تخطيتها واتعاملت معاها؟
= أكيد مفيش نجاح بدون صعاب وعقبات، أول مشكلة قابلتني هي الإحباط وعدم اهتمام الناس بالشعر لأن مابقاش فيه اهتمام بالقراءة...
اتخطيتها لما بدأت مخافش من التنفيذ، لما جازفت وخدت قرار النشر بعد اكتر من 7 سنين مستني والديوان مكتوب!.
- إيه الأخطاء اللي بتنصح إي كاتب/ة مايقعش فيها؟
= أنه يبدع وميحاولش يقلد ، إنه مايتأثرش بكاتب واحد أو لون واحد من الكتابة
إنه مايقيسش نجاحه بعدد الناس اللي تعرفه لأن لو عنده موهبة هييجي اليوم اللي كل الناس تعرفه وتشوفه كبير.
يبعد عن السطحية ف الكتابة ويتعلم عمق المعنى والتشويق في وصف المشهد.
- أهم الصفات في الكاتب هي إيه؟
=اللباقة، الأمانة، لازم يكون أمين إنه مينشرش في العقول سم بدل ما ينشر كلام هادف.
لازم يكون ذكي في اختصار الوصف بكم قليل من الكلام.
لازم يكون مستمع اكتر ماهو متكلّم.
- مين كان جنبك في أول خطوة ليك؟
= أهلي مفيش أي حد فيهم قصّر معايا ودايما الأهل لازم يكونوا هم الداعم الأول والأهم.
- كلمنا عن انجازاتك؟
شاركت في أكتر من ايفنت فنّي، وايفنت تحت تنظيم جامعة القاهرة، وواحدة مناهضة ضد التحرش والعنف مع المرأة، وحصلت على مركز تاني على مستوى الجامعة بقصيدة «ماليش صالح»، وحصلت على مركز أول على كلية الحقوق جامعة القاهرة في مسابقة الأدب العربي،
حصلت على وسام من جامعة القاهرة في الشعر العربي
وآخر حاجه هي نشر وكتابة ديواني الأول ( نِيّكتوفيليا ) .
- إحساسك بعد كل نجاح ليك؟
بشكر ربنا لأن فضله عليا كبير، ثم لأهلي.
- كلمنا عن خططك المستقبلية؟
=بخطط لكتابة نوع جديد من الكتابة وهو النثر العربي بالفصحى،
وده هيكون تجربة جديدة ومستقلة عن كتابتي للشعر بالعامية، ومش هوقفها.
- هل عندك مواهب تانية؟
= ممارسة الرياضة .
- وجه كلمة للجريدة؟
= بشكركم على وقتكم ومجهودكم وبتمنى التوفيق الدايم .
- كلمة أخيرة نختم بيها الحوار الصحفي؟
=بشكرك جدا يا أستاذة رِهام وحقيقي ممتن ليكي ولكل اللي ذكر اسمي أو أثنى على فنّي
سعدت جدًا بالحوار مع حضرتك شكرًا جزيلًا.
رئيس التحرير: عبدالله البنا
الإشراف العام: هند مصطفى
الوسوم:
عدد اليوم